O proxecto da futura planta de hidróxeno verde promovida pola mugardesa Reganosa e a portuguesa EDP e que se asentará na vila das Pontes entrou en fase de exposición e consulta. Así se recolle na publicación no Diario Oficial de Galicia (DOG), onde se figura a súa solicitude de autorización ambiental integrada, o seu estudo de impacto, a súa declaración de utilidade e a documentación do proxecto en si.

Este trámite, esencial para a consecución da proposta, supón a apertura dun prazo de 30 días hábiles para o estudo da iniciativa polas partes interesadas e, consecuentemente, para a presentación de alegacións e observacións á mesma. De igual modo, desde a administración autonómica lembrouse que o complexo, bautizado como H2Pole, foi declarado o pasado mes de setembro polo Consello da Xunta como Proxecto Industrial Estratéxico; unha denominación que facilita e axiliza a tramitación desta clase de propostas –salvo na presentación de solicitudes e recursos– ao amparo da Lei de simplificación administrativa de Galicia.

De igual forma, desde a Consellería de Economía incidiuse en que, unha vez estea marcha o proxecto ao completo, xeraranse na área sobre un centenar de postos de traballo, entre directos e indirectos. A iniciativa, como reflicte o documento do DOG, supoñerá un investimento total –en termos materiais– de 156.174.308 euros.

Así, durante esta primeira fase desenvolverase unha planta de produción de hidróxeno proveniente de auga mediante electrólise, usando para iso fontes de enerxía renovable –e, por iso, logrando a catalogación de “verde”– e que terá unha capacidade de 20 megawatts. Durante a segunda e terceira fase do proxecto, como se explicou no seu momento, devandito volume crecerá ata os 50 e 100 megawatts, respectivamente, entrando esta última en funcionamento en 2030. Este combustible, doutra banda, destinarase tanto á futura actividade industrial da área, como á súa inxección directa á rede –algo fundamental no contexto do gasoduto troncal que conecta Portugal con España e Francia– e para a mobilidade.

Por último, desde a Consellería de Economía subliñouse que a iniciativa H2Pole forma parte dun dos proxectos seleccionados polo Goberno central para o Perte das Enerxías Renovables e o Hidróxeno.

galiciaxa.com