O proxecto, que contará cun investimento de 18 millóns de euros, prevé crear entre 70 e 120 postos de traballo directos no municipio.

As Pontes acollerá o vindeiro mércores 28 de outubro a presentación oficial da nova planta industrial de Indra, un acto que estará encabezado polo conselleiro delegado da compañía, Josep María Recasens.

A fábrica instalarase no polígono de Penapurreira, nos terreos que anteriormente ocuparon Hierros Añón e Daxiong Spain, e estará especializada no sector da defensa.

O novo centro terá como actividade principal a integración de tres tipos de vehículos militares: o blindado anfibio VACIM, destinado á Infantería de Mariña; unha plataforma de artillaría autopropulsada sobre rodas; e vehículos tácticos lanzapontes.

As instalacións estarán preparadas para realizar os traballos de montaxe, comprobación e posta en funcionamento destes sistemas. Ademais, dispoñerán dunha pista propia para efectuar probas e incorporar tecnoloxías avanzadas nos procesos de produción.

A investimento previsto ascende a 18 millóns de euros, cunha estimación de entre 70 e 120 empregos directos cualificados, aos que poderían sumarse outros postos de traballo vinculados ás empresas auxiliares e aos provedores.

A factoría pontesa integrarase na rede industrial de Indra Land Vehicles xunto coa planta de Xixón. Entre ambas sumarán arredor de 40.000 metros cadrados de superficie construída, que poderían ampliarse ata os 55.000 coa incorporación doutra fábrica no norte peninsular.

Con esta iniciativa, As Pontes incorporará unha nova actividade industrial vinculada á fabricación de equipamento militar, nun contexto de transformación do tecido produtivo local.

Fuente: La Voz de Galicia