Dende a Plataforma en Defensa do Patrimonio Industrial das Pontes temos o pracer de comunicar, nestas datas de Nadal, que o expediente de declaración da cheminea da Central Térmica das Pontes como Ben de Interese Cultural (BIC), impulsado pola Plataforma hai algo máis dun ano e amplamente respaldado pola veciñanza das Pontes, conta xa con dous informes favorables emitidos por órganos consultivos competentes.

​Este feito supón un paso decisivo no procedemento administrativo, pois, de acordo co establecido na Lei do Patrimonio Cultural de Galicia, a Dirección Xeral de Patrimonio Cultural dispón neste momento das ferramentas técnicas necesarias para resolver favorablemente a declaración, con base en criterios obxectivos, contrastados e plenamente fundamentados.

​Dende a Plataforma confiamos en que os criterios técnicos coincidan cos criterios políticos, e agardamos que a resolución definitiva chegue á maior brevidade posible. Trátase dunha demanda xusta, sostida no tempo, pola que se leva loitado con perseveranza e que conta coa esperanza e a expectativa dunha parte moi significativa da poboación das Pontes. Con amplios apoios de institucións técnicas a nivel estatal e internacional e, dende hoxe, con dous informes de institucións consultivas acreditadas pola lei.

​Celebramos, por tanto, a consecución destes dous informes favorables como un fito colectivo, froito do traballo rigoroso, da mobilización social e do compromiso coa defensa do noso patrimonio industrial.

​Ao mesmo tempo, queremos reiterar que a Plataforma mantén activa a solicitude formal adicional da incoación do expediente BIC do Parque de Carbóns e unha unidade funcional representativa da Central (integrada por unha torre de refrixeración, unha turbina e unha caldeira), en concordancia con demandas multisectoriais expertas, solicitude que non responde a unha posición maximalista, senón á vontade de garantir a conservación —ou cando menos a avaliación técnica rigorosa— doutros elementos esenciais dun complexo industrial único, e que poderían ter amplos e variados usos.

​Neste sentido, volvemos reclamar a creación dunha comisión técnica interdisciplinar, coa participación das administracións implicadas, da empresa propietaria e da representación social, tal e como se recolle no noso Manifesto do 5 de agosto, subscrito por máis de 2.000 persoas das Pontes. Entendemos que só a través dunha avaliación compartida, transparente e baseada en criterios técnicos se poderá tomar unha decisión responsable sobre o futuro destes elementos.

​A Plataforma reafirma así o seu compromiso cunha defensa serena, documentada e construtiva do patrimonio industrial das Pontes, entendéndoo como parte esencial da nosa identidade colectiva e como unha oportunidade de futuro para o territorio.

​CONTACTO

  • ​Email: plataforma-patrimonioindustrial@gmail.com
  • ​Instagram: @plataformapatrimonioindustrial
  • ​Twitter/X: @PatrimonioAs
  • ​Facebook: Plataforma en Defensa do Patrimonio Industrial das Pontes